Shkup, 16 tetor - Qindra qytetarë, nën organizim të lëvizjes qytetare “Zgjohu”, protestuan sot qetë dhe në mënyrë dinjitoze para ambasadës serbe në Shkup, në shenjë revolte kundër djegies së flamurit shqiptarë nga huliganët serbë. Protestuesit në mënyrë të improvizuar disa minuta luajtën futboll para ambasadës dhe në fund i dhuruan asaj dy flamuj, atë të BE-së dhe NATO-s, duke përkujtuar se me djegien e flamurit shqiptar serbët kanë djegur edhe gjasat për integrimin e tyre në këto dy institucione të fuqishme ndërkombëtare.

“Serbia akoma merret me djegie dhe jo me dialog, me dhunë e jo me bashkëpunim, me barbarizëm dhe jo me qytetërim, me kërcënime dhe jo me shtrirje të dorës së pajtimit”, tha Ismail Krifca nga kjo lëvizje.

Para ambasadës serbe në Shkup protestuesit kërkuan nga shteti serb që t’i kërkohet falje gjithë shqiptarëve kudo që jetojnë.

Protesta përfundoi e qetë dhe pa ndonjë incident. Për këtë sjellje dinjitoze, organizatorët falënderuan të gjithë protestuesit e sotëm.