Medina Mikë/e i/e Forum-it
Numri i postimeve : 17104 Data regjis. : 12/11/2009 Age : 34 Location : Tek Parajsa Pa Drita
| Titulli: Edi Rama: Martohem javen e ardhshme Mon Oct 18, 2010 12:34 am | |
| Lideri i opozitës, Edi Rama, deklaroi dje, se në fund të javës së ardhshme do të martohet, duke e cilësuar këtë zhvillim si një moment të rëndësishëm të jetës së tij, që dëshiron ta ndajë me miqtë dhe të afërmit. Në një njoftim të shkurtër për mediat, zyra e shtypit të PS-së, citon kreun e selisë rozë i cili thotë se:
“Dëshiroj të konfirmoj vërtetësinë e lajmit për lidhjen time në martesë me Lindën. Është një moment i veçantë në jetën time, që dëshiroj ta ndaj me të afërmit e miqtë në fund të javës së ardhshme”. Nga burime pranë kreut të PS-së, mësohet se ceremonia e kurorëzimit do të zhvillohet në kryeqytet, në Kishën Katolike, ku pritet të marrin pjesë vetëm një numër i ngushtë të afërmish dhe miqsh nga familja e Ramës, si dhe e bashkëshortes së re, Linda Bashës. Përveç ceremonisë së kurorëzimit, pritet që lideri i opozitës të organizojë edhe festën me drejtues dhe deputetë të PS-së, ku gjithashtu mësohet se do të marrin pjesë një grup jo shumë i gjerë të ftuarish, ku sipas burimeve mësohet se do të jenë prezentë edhe eksponentë të rëndësishëm të komunitetit ndërkombëtar në Shqipëri. Profili i bashkëshortes
Linda Basha ka lindur në një familje tradicionale tiranase dhe është një prej tre fëmijëve. Bashkëshortja e ardhshme e kreut të opozitës shqiptare, aktualisht ka një vajzë, Rean, që studion arkitekturë. Vetë Linda ka studiuar ekonomi në Universitetin e Tiranës. Në vitin 1993 ka kryer studimet Master për Ekonomi në Universitetin e Nju Jorkut dhe Universitetin e Europës Qendrore në Pragë. Prej vitit 1996 mban titullin Doktore e Shkencave Ekonomike. Ajo ka punuar në detyra të ndryshme të administratës publike. Puna e saj e parë ka qenë në departamentin ekonomik të Kombinatit të Tekstilit në Tiranë dhe më pas në Agjencinë Kombëtare të Privatizimit pranë Këshillit të Ministrave, ku ka qenë edhe në funksionin e drejtores së përgjithshme deri në vitin 1998. Më pas është përfshirë në aktivitetin e shoqërisë civile si drejtore ekzekutive e Qendrës për Nxitjen e Zhvillimit Njerëzor për dhjetë vite. Aktualisht Linda mbulon kërkimin dhe zhvillimin shkencor në këtë qendër që sot drejtohet nga Ylli Çabiri, të cilin Presidenti Obama e emëroi së fundmi si të vetmin shqiptar në bordin e Fondacionit Shqiptaro-Amerikan të Zhvillimit. Linda ka një përvojë të gjatë akademike si lektore e Financave Ndërkombëtare në Universitetin e Tiranës dhe Politikave Publike e Riskut Publik në Universitetin Europian të Tiranës. Është studiuese e fushave që lidhen me zhvillimin ekonomik e social. Për llogari të institucioneve ndërkombëtare, ajo ka drejtuar punën e bashkëpunuar për studime mbi reformat për nxitjen e zhvillimit ekonomik dhe biznesit, zbutjen e varfërisë, reformimin e sektorit të arsimit, zhvillimin njerëzor, qeverisjen e mirë, zhvillimin vendor, decentralizimin në Shqipëri e në rajon. Linda është gjithashtu autore e një sërë publikimesh brenda dhe jashtë vendit, si dhe pjesëmarrëse e ftuar vijimësisht në konferenca ndërkombëtare për këto fusha studimore.
Linda nuk ka pasur aktivitet politik dhe fusha e interesit të saj publik ka qenë e mbetet shoqëria civile shqiptare, ku ajo është angazhuar vijimësisht për mbrojtjen e të drejtave të njeriut, veçanërisht të fëmijëve, grave dhe minoriteteve. Për këto kontribute të saj ajo është zgjedhur edhe anëtare prej disa vitesh në bordin e Fondacionit Soros për Shoqërinë e Hapur në Shqipëri, të cilin e drejton prej dy vjetësh.
|
|