Tiranë, 21 tetor - Presidenti i Shqipërisë Bamir Topi, gjatë një takimi me Presidentin e Këshillit Evropian, Herman Van Rompuy, nënvizoi rëndësinë e rritjes së intensitetit të marrëdhënieve mes fqinjëve, duke nxitur dialogun politik dhe bashkëpunimin për çështje me interes reciprok e rajonal. Gjithashtu, Presidenti Topi përshëndeti Rezolutën e Parlamentit Evropian për Kosovën, si dhe mirëpriti pozicionin e eurodeputetëve për të unifikuar qëndrimin e vendeve të BE së ndaj Kosovës dhe për të inkurajuar Komisionin që të fillojë dialogun me Prishtinën për liberalizimin e vizave për qytetarët kosovarë. Në këtë kuadër, Kryetari i Shtetit shqiptar vuri në dukje se "shteti i ri i pavarur i Kosovës, që nga 17 shkurti 2008, ka bërë hapa të mëdhenj e të admirueshëm në forcimin e institucioneve demokratike të shtetit ligjor, zhvillimin e ekonomisë, si dhe në bashkëpunimin rajonal e ndërkombëtar". Duke iu referuar situatës aktuale në Kosovë, Presidenti i Shqipërisë theksoi në këtë takim se "është shumë e rëndësishme që çdo hap i zhvillimeve politike në vend po bëhet konform ligjit themeltar të shtetit, Kushtetutës së Republikës së Kosovës, çka i shërben ruajtjes së stabilitetit në Kosovë, si faktor me rëndësi dhe në atë rajonal" dhe shprehu besimin se klasa politike kosovare ka fituar tashmë pjekurinë dhe përvojën e duhur për ta kapërcyer me sukses edhe këtë sfidë të përkohshme.