Prishtinë, 21 tetor – Partia Demokratike e kryeministrit Hashim Thaçi do të presë jo shumë gjatë dhe do të provojë ta çojë vendin në zgjedhje të parakohshme, që duhen mbajtur brenda vitit. Ngritja e mocionit në Kuvend për votëbesimin e Qeverisë do t’u paraprijë zgjedhjeve.
Për herë të parë, të mërkurën, zyrtarë të kësaj partie, kanë treguar se si e mendojnë zgjidhjen, pas krizës institucionale që u krijua në vend me daljen e Lidhjes Demokratike të Kosovës nga Qeveria. Formula, sipas anëtarit të kryesisë së PDK-së, Memli Krasniqi, gjendet në tri nene të Kushtetutës.
“Kushtetuta e Republikës së Kosovës, veçanërisht neni 82, neni 95 dhe neni 100, paraqesin provizione të mjaftueshme kushtetuese për tejkalimin e kësaj krize në mënyrë sa më të shpejtë”, ka thënë Krasniqi në një konferencë shtypi. “PDK-ja është duke shqyrtuar me seriozitet çdo ditë dhe shumë shpejt do të ketë një rrugëdalje nga situata e tanishme”.
Neni 100 i Kushtetutës flet për mocionin e votëbesimit. Sipas këtij neni, mocioni mund të ngrihet me propozimin e një të tretës së të gjithë deputetëve të Kuvendit, ose këtë mund ta kërkojë kryeministri.
Mocioni i mosbesimit vihet në rendin e ditës të Kuvendit, jo më vonë se pesë ditë e as më herët se dy ditë nga data e parashtrimit të tij. Sipas këtij neni të Kushtetutës, konsiderohet se mocioni i mosbesimit është pranuar, nëse për të kanë votuar shumica e të gjithë deputetëve të Kuvendit të Kosovës.
Ndërkaq, neni 82 precizon se “Kuvendi mund të shpërndahet nga presidenti i Republikës së Kosovës, pas votimit të suksesshëm të mosbesimit të Qeverisë”, kurse neni 66 se “në raste të shpërndarjes së Kuvendit, (zgjedhjet organizohen v.j.) jo më vonë se dyzet e pesë (45) ditë pas shpërndarjes”.
Neni 95 flet vetëm për zgjedhjen e qeverisë.
Zgjidhja për të cilën është përcaktuar PDK-ja, në fakt, është ajo çfarë kryeministri Thaçi i ka pëshpëritur Skënder Hysenit në vesh, ditën kur është provuar të votohej Strategjia për PTK-në në Kuvend. Në këtë seancë LDK-ja ishte vënë në krah të opozitës. Duke braktisur Kuvendin, kishte bërë që të mos ekzistonte kuorumi në rastin e votimit.
Hyseni, që është anëtar i Kryesisë së LDK-së, në një konferencë shtypi që ka mbajtur po të mërkurën, ka treguar se çfarë i kishte thënë kryeministri, ani se tjetër çka ishte spekuluar në media.
“Absolutisht nuk është e vërtetë ajo çka keni dëgjuar. Atë ditë kryeministri Thaçi, për kuriozitetin tuaj, ka thënë që kjo mund të na çojë në zgjedhje të jashtëzakonshme”, ka thënë Hyseni. “Përgjigjja ime ka qenë, nëse kjo ka mbetur, atëherë edhe mund ta bëj”.
Deri më tash LDK-ja nuk është shprehur pro zgjedhjeve që duhet mbajtur këtë vit, por Hyseni ka deklaruar se është i pranueshëm edhe ky opsion.
“Koha Ditore”, duke u bazuar në burime të saj, ka shkruar se po shqyrtohen dy mundësi për të iniciuar votëbesimin e Qeverisë: këtë ta bëjë kryeministri Hashim Thaçi, që është edhe kryetar i PDK-së, apo kjo të bëhet me iniciativë të deputetëve.
Ndërkaq, është Aleanca Kosova e Re, parti opozitare, por e afërt me PDK-në, që po e shqyrton mundësinë e ngritjes së mocionit të mosbesimit për Qeverinë. Kreu i saj, Behgjet Pacolli, i ka ftuar rreth një tryeze të rrumbullakët të gjitha partitë e opozitës për të unifikuar qëndrimet në lidhje me krizën në vend.
Sipas një komunikate për shtyp të AKR-së, tryeza në nivel kryetarësh, sipas një agjende të pranuar me konsensus, duhet të dalë me propozime dhe vendime konkrete për gjetjen e zgjidhjeve në përputhje me Kushtetutën dhe interesin e qytetarëve. Ngritja e mocionit pritet të jetë një nga temat e takimit.
Lidhja Demokratike e Dardanisë, një parti tjetër opozitare, tashmë është deklaruar pro këtij mocioni, duke lënë të vetme Aleancën për Ardhmërinë e Kosovës që nuk është për këtë zgjidhje.
“Nuk duam të kemi një vendim të njëanshëm që ne të diktojmë rrjedhën e gjërave, por duam që nëse është e mundshme të ketë konsensus, nëse është e mundshme që partitë politike t’i vendosin të gjitha interesat shtetërore para interesave partiake, dhe nëse kjo është e mundshme atëherë do të jetë shumë lehtë”, ka deklaruar Memli Krasniqi. “Nëse disa parti vazhdojnë t’i kenë interesat grupore partiake para interesave të shtetit, atëherë ndoshta edhe nuk do të ketë konsensus dhe më pas do të gjendet një zgjidhje tjetër, por gjithmonë e bazuar në Kushtetutë dhe në ligje”.