Skenderaj, 23 tetor – Kastriot Duka, i njohur si hoxha i Marinës dhe i dëbuar nga Kosova në fillim të marsit, është kthyer sërish në Kosovë dhe në Skenderaj e Marinë, ku e kishte strofullin. Burime të Kohës Ditore ka kohë qe pohojnë se hoxhën e kanë parë shumë herë në Marinë, Skenderaj e vende tjera, por mbrojtësit e tij ishin arsyetuar se ai nuk është Kastrioti, por vëllai i tij, që i ngjaka. Njëjtë ishte pohuar edhe nga autoritete zyrtare.
Mirëpo, të premten pas dite, Duka është parë të qëndrojë në Skenderaj madje në shumë vende. “Më shumë se një orë ka qëndruar në një lokal afër ish Konviktit të nxënësve, jo shumë larg Stacionit të Policisë në Skenderaj”, kanë treguar burime të gazetës, emrat e të cilëve janë të njohur për redaksinë.
Këtë ndejë të Dukës, të shtunën, fillimisht e kanë mohuar pronarët e lokaleve në atë pjesë të qytetit, por të përballur me dëshmitë, ata e kanë pranuar vizitën e tij. “Po, e kemi pa me një xhip të kaltër këtu para lokaleve ka ndejtë me disa njerëz, por në lokal nuk ka hy”, ka thënë njëri prej pronarëve.
Gjithnjë sipas burimeve të gazetës, Duka & kompani, për aq gjatë sa kanë qëndruar në Skenderaj dhe në fshatin Marinë ka qenë e pamundur të mos vëreheshin nga policia.
Madje, një zyrtar i policisë vet e kishte pranuar se janë në dijeni të kësaj.
Kastriot Duka ishte dëbuar nga Kosova më 3 mars të këtij viti. Inspektorët e patën mbyllur xhaminë e Marinës më 2 mars, kurse të nesërmen MPB e kishte dëbuar, pasi Gjykata e kishte shpallë person të padëshirueshëm në Kosovë.