Prishtinë, 26 tetor - Jan Harlan, producenti ekzekutiv i shumicës së filmave të autorit të madh të kinematografisë botërore, fitues i çmimit Oscar dhe i shumë çmimeve të tjera, Stanley Kubrick, është njëri nga emrat me nam që do të vijë në Prishtinë. Harlan ka konfirmuar pjesëmarrjen në festivalin ndërkombëtar të studentëve për film dhe teatër “Skena UP”, kanë njoftuar të hënën nëpërmjet një komunikate për media organizatorët e festivalit. “Skena UP” do të mbahet më 3 deri më 10 dhjetor në Prishtinë. Harlan - i cili ka punuar edhe me shumë autorë të tjerë, duke përfshirë edhe Steven Speilberg në filmin “Artificial Intelegence”, do të kryesojë jurinë e festivalit.
“Do të mbaj një ligjëratë para pjesëmarrësve”, thuhet në komunikatë. “Ai ka shprehur dëshirën dhe entuziazmin e tij që të jetë për herë të parë në Kosovë”.
Jan Harlan në vitin 1969 iu bashkohet Stanley Kubrikut për projektin “Napoleon”, projekt i cili fatkeqësisht u braktis. Harlan njëherësh është vëllai i Christiane Kubrick, e cila është e veja e regjisorit me nam. Studimit të kinematografisë ia shtoi edhe njohjen me mësuesin e tij të madh, Kubrick. Filmi i tij i parë si asistent ka qenë “A Clockwork Orange”. Katër vjet më vonë ai bëhet producenti ekzekutiv i Kubrickut dhe punoi për Warner Bros në filmat “Barry Lyndon”, “The Shining”, “Full Metal Jacket” dhe “Eyes Wide Shut”. Pas vdekjes së Stanley Kubrick në vitin 1999, ai filloi të punonte me Steven Spielberg në projektin për “A.I. Artificial Intelligence”. Në vitin 2000, Harlan realizoi dokumentarin “Stanley Kubrick: A Life in Pictures” me Melanie Viner Cuneo dhe një dokumentar tjetër për aktorin britanik Malcolm McDowell me Katia de Vidas. Përveç ligjëratave nëpër shkolla të filmit dhe pjesëmarrjeve në juri nëpër festivale të ndryshme, Jan Harlan së bashku me Erik Nelson dhe Alison Castle janë duke përgatitur një film dokumentar mbi projektin “Napoleon” të Kubrickut.