Beograd, 29 tetor - Ministri serb i Punëve të Jashtme Vuk Jeremiq ka deklaruar se në bisedimet me Prishtinën "së pari duhet filluar nga temat të cilat nuk përmbajnë çfarëdo kontraverze, si vendosja e bashkëpunimit në zgjidhjen e problemit të të zhdukurve". "Arritja e suksesit që në fillim gjithsesi do të kishte efekt pozitiv për fazat e ardhshme të dialogut, kur të prekim çështjet delikate. Sidoqoftë, negociatat duhet t'i zhvillojnë ekspertët e jo funksionarët e lartë apo politikanët", ka thënë Jeremiq në një intervistë për gazetën "Veçernje novosti".
Ai ka thënë se "nuk duhet patjetër për t'iu qasur negociatave për statusin që të gjenden zgidhjet për ato probleme që rezultojnë nga fakti se të dyja palët kanë pikëpamje të ndryshme fundamentale sa i përket çështjes së sovranitetit mbi territorin e Kosovës". Sipas Jeremiqit, "nevojitet që të dyja palët të shprehin një konstruktivitet për të arritur një kompromis rreth çështjeve të hapura". Por Jeremiq ka theksuar se "Beogradi me siguri nuk do të pranojë asnjë zgjidhje e cila mund të kuptohet si njohje e pavarësisë, dhe vetvetiu as përkufizimin e Serbisë dhe Kosovës si dy shtete të pavarura".
I pyetur nëse është reale të pritet që çështja e ndarjes së Kosovës të imponohet si një nga zgjidhjet, Jeremiq la të kuptohet se edhe për këtë temë mund të bisedohet, duke thënë se "çdo zgjidhje rreth së cilës mund të arrihet konsensusi e të dyja palëve të interesuara është më e mirë se e zgjidhja e imponuar". "Do të vazhdojmë që nëpërmjet negociatave në mënyrë konstruktive të angazhohemi për arritjen e një kompromisi historik mes serbëve dhe shqiptarëve", është shprehur Jeremiq.