Ferizaj, 4 nëntor - Pas disa vitesh të kaluara në Lidhjen Demokratike të Dardanisë, Adem Salihaj, udhëheqës shumëvjeçar i Lidhjes Demokratike të Kosovës, sërish u zgjodh kryetar i degës së kësaj partie në Ferizaj.

Salihaj të mërkurën mbrëma në Kuvendin Zgjedhor të Degës së LDK-së fitoi më shumë vota se kundërkandidati i tij, Milazim Haliti, së bashku me të cilin vetëm pak muaj më parë e braktisën Degën e LDD-së, duke iu bashkuar, siç thonë, 'shtëpisë së vjetër'.

Kuvendi zgjodhi edhe Kryesinë e Degës së LDK-së me 41 anëtarë.

Adem Salihaj, si udhëheqës i LDK-së, është zgjedhur për disa vjet rresht kryetar i Kuvendit Komunal të Ferizajt e deputet i Kuvendit të Kosovës, ndërsa për një kohë ka qenë edhe zëvendëskryeministër i Qeverisë së Kosovës.

Anëtari i Kryesisë qendrore të LDK-së, Ismet Beqiri dhe kryetari i sapozgjedhur i LDK-së së Ferizajt, Adem Salihaj, shprehen besimin se me prurjet e reja dhe me cilësinë e anëtarëve të Kryesisë së Degës, partia e tyre synon të korrë suksese, të ngjashme me ato të para 7-8 viteve, kur fitonte bindshëm në zgjedhje.