Prishtinë, 9 dhjetor - Kandidati i AAK-së, Ramiz Kelmendi ka prezantuar pjesë të programit ekonomik të kësaj partie, duke thënë se kjo parti ka strategji që për dy vjet të punësojë 200 mijë punëtorë. Ai ka thënë se nuk është për t'u mjaftuar me rritjen ekonomike prej 7 për qind, ngase Kosova ka nevojë për një rritje ekonomike prej 30 për qind në vit.
Këto komente, Kelmendi i bëri në një konferencë për media, me ç'rast edhe ka dhënë premtime të fuqishme, duke thënë se në vitin 2011 do të punësohen 100 mijë persona, kurse po aq do të punësohen në vitin 2012.
“328 mijë janë tani, në fund të vitit 2011 do të jenë 428 mijë, ta jap çfarë fjale të duash, por do ta shihni këtë numër, nëse Qeveria Haradinaj do të jetë në krye, dhe në vitin 2012 do të kalojë ky numër në 528 mijë, nga gjithsej që duhet të jenë të punësuar 900 mijë", ka thënë Kelmendi.
Kësisoj, Ramiz Kelemendi ia ka kaluar me premtime edhe Behgjet Pacollit, i cili gjatë kësaj fushate ka premtuar punësimin e nga 30 mijë personave, përkatësisht të 120 mijë personave brenda 4 vjetëve të ardhshëm, natyrisht me kusht që t’i fitojë zgjedhjet e 12 dhjetorit.