Kryeministri Hashim Thaçi pas kthimit nga Finlanda ka përsëritur përkushtimin e tij në luftën kundër korrupsionit dhe krimit të organizuar – madje duke thënë se, ai vazhdon të qëndrojë në vijën e parë të luftës ndaj këtyre dukurive.
“Duhet ndarë politikën nga drejtësia. Unë do të vazhdojë të jam në vijën e parë të luftës kundër korrupsionit dhe krimit të organizuar dhe me një rol mbështetës të EULEX-it, me një transparencë të plotë dhe bashkëpunim të ngushtë”, ka thënë Thaçi.

Kryeministri Thaçi po ashtu është shprehur se ky kapitull është hapur, dhe atë pikërisht në kohen e qeverisjes së tij.

“Do të jemi pa kompromis nga dita e parë e lirisë së Kosovës, nga 12 qershori 1999 e deri në ditët e sotme e tutje. Janë 111 raste në hetim për dyshime të zyrtarëve të lartë në të gjitha kohërat, do të thotë nga qershori 1999 e deri më tani”, ka thënë Thaçi, duke i siguruar qytetarët e Kosovës se nuk do të mbetet asnjë rast pa u hetuar dhe pa u përfunduar në bazë të “standardeve të drejtësisë”. /