Në top-agjendën e të gjitha institucioneve të Kosovës duhet të jetë lufta kundër korrupsionit, një gjë e tillë tashmë ka filluar të ndodhë, janë disa elemente pozitive dhe është i domosdoshëm një përkushtim më i fuqishëm i të gjithë mekanizmave- ka thënë në një intervistë për Radion Evropa e Lirë, shefi i Agjencisë Anti-Korrupsion, Hasan Preteni.
Ai thotë se duhet të nxirren nga Kuvendi edhe disa ligje tjera, e më pastaj mekanizmat ekzistues duhet ende të fuqizohen. Preteni e konsideron hap shumë të mirë fillimin e reformimit të gjyqësorit, sepse, sipas tij, është një institucion shumë i atakuar.

“Mendoj që startimi i reformimit është i mirë dhe vetëm në nivelin qendror, e më pastaj ka filluar edhe niveli i dytë, domethënë nëpër gjykata dhe në Prokurori të Qarkut që të emërohen zyrtarët e rinj. Pastaj një punë edhe më e fuqishme edhe e policisë në hetime, e agjencisë por edhe mekanizmave të tjerë duhet të jetë më e fuqishme dhe rezultatet nuk do të mungojnë”, është shprehur Preteni.