Nënkryetari i Lidhjes Demokratike të Dardanisë, Lulzim Zeneli vlerësoi të mërkurën se deklaratat e qeverisjes aktuale se do të luftojnë korrupsionin janë demagogji e thjeshtë dhe asgjë më tepër.

Nënkryetari i LDD-së vlerësoi po ashtu se dalja me deklarata e zyrtarëve të EULEX-it për arrestimin e peshqve të mëdhenj dhe mungesa e rezultateve në praktik bënë që lufta kundër krimit të organizuar dhe korrupsionit të banalizohet.

“Pushteti aktual PDK-LDK, sikur të ketë vullnet politik dhe guxim për ta luftuar korrupsionin dhe krimin e organizuar, do të kishim veprime dhe rezultate, prandaj deklarimet se qeverisje aktuale do t’i prin luftës kundër krimit të organizuar dhe korrupsionit në kohen kur kjo qeverisje PDK-LDK është zhytur skajshmërish në krim financiar dhe korrupsion, nuk janë gjë tjetër përpos demagogji”, u shpreh Zeneli.

Ai tha se LDD rithekson qëndrimin se sundimi i ligjit nuk arrihet me deklarata publike dhe me distancim nga qeverisja e korruptuar dhe këtë sipas tij duhet ta dijë edhe ICO dhe EULEX-i, ata të cilët kanë ardhur të ftuar nga institucionet e Kosovës për të vendosur rend dhe ligj.