Një burrë në Kinë ka vdekur në tavolinën e operacionit, pasi mjeku i tij u largua si rrjedhojë e një zjarri të shpërthyer në dhomën përkrah. Historia ka bërë xhiron e botës, duke përfunduar edhe në faqet e gazetave britanike. Pacienti, një 50-vjeçar nga Shangai të cilit i duhej hequr një këmbë, vdiq pasi u la në tavolinën e operacionit, pa asnjë ndërhyrje për 30 minuta.
Një infermier kërkoi më kot të shuajë zjarrin, që ishte shkaktuar nga një makinë disinfektimi. Megjithëse ai dështoi, personeli që duhej të merrej me pacientin tentoi gjithsesi të vazhdojë me operacionin. “Por teksa po mbaronim, zjarri mori përmasa gjigante dhe doktori iku nga frika”, ka treguar një zëdhënës i spitalit. Zjarrfikësit nuk i lejuan mjekët të kthehen në sallën e operacionit dhe atëherë kur u kthyen, zbuluan se burri kishte vdekur, ndoshta për shkak të mbytjes së ardhur nga tymi.
Mësohet se për këtë rast, policia ka hapur një hetim, ndërsa spitali ka pezulluar protagonistët e këtij episodi dhe gjithashtu është gati të dëmshpërblejë edhe familjen e viktimës.