Përfaqësuesi Civil Ndërkombëtar (ICR), Pieter Feith, ka vlerësuar se zgjedhjet e djeshme lokale në Partesh, kanë dëshmuar se Kosova po bëhet atdheu i të gjithë qytetarëve të saj.

“I përgëzoj institucionet e Kosovës dhe qytetarët e Parteshit për zgjedhjet e suksesshme, të cilat u mbajtën dje në komunën e re”, ka deklaruar Feith.

Pjesëmarrja shumë e lartë – mbi 65% – sipas Faithit, është demonstrim i madh për gatishmërinë e popullsisë me shumicë serbe të Parteshit të përqafojë mundësitë e ofruara nga decentralizimi dhe vlerat e përcaktuara në Kushtetutë: shtet i lirë, demokratik dhe shumetnik, i cili është atdheu i të gjithë qytetarëve të saj.

“Mbajtja e qetë e zgjedhjeve të organizuara nga institucionet e Kosovës pasqyron zhvillimin dhe progresin e tyre të vazhdueshëm”, ka vlerësuar ai.

“Dje qytetarët e Parteshit e morën të ardhmen në duart e tyre. Duke zgjedhur udhëheqësinë e komunës së tyre të themeluar rishtazi ata kanë bërë demokracinë realitet për vete dhe kanë shfrytëzuar të drejtën e tyre të ndikojnë në çështjet që ata i brengosin më së shumti. Kjo është pjesë e procesit të decentralizimit, i cili është në vazhdim e sipër në tërë Kosovën. Ai i afron vendimmarrësit me popullin në mënyrë që qeverisja të bëhet më efikase dhe më e përgjegjshme ndaj qytetarëve”, ka shtuar ai.

“Shpresoj që raundi i dytë i zgjedhjeve të jetë po aq i suksesshëm sa edhe raundi i parë. E inkurajoj popullin e Parteshit të shfrytëzojnë të drejtën e tyre të votojnë prapë dhe t’i zgjedhin përfaqësuesit, të cilëve ata ju besojnë dhe të cilët punojnë për të mirën e komunës”, përfundon deklarata e Feithit.

Edhe presidenti i vendit, Fatmir Sejdiu ka çmuar lart procesin zgjedhor të organizuar në Komunën e re të Parteshit, organizuar të dielën.

Duke e vlerësuar pjesëmarrjen e lartë të qytetarëve në procesin zgjedhor për pushtetin lokal në këtë komunë të banuar me pjesëtarë të komunitetit serb, presidenti Sejdiu tha se kjo është një provë e mirë që tregon se qytetarët e këtij komuniteti po i kthehen realitetit dhe perspektivës së përbashkët në Kosovë.

“Organizimi i zgjedhjeve për pushtetin lokal në Komunën e Parteshit, pas organizimit të suksesshëm të zgjedhjeve në komunën e Graçanicës, Kllokotit dhe Ranillugut, dëshmon përkushtimin e institucioneve të Republikës së Kosovës për zbatimin e plotë të detyrimeve që dalin nga Pakoja e Presidentit Ahtisari”, theksoi presidenti Sejdiu.

Gjithashtu, ai pohoi se ky proces, edhe një herë, dëshmoi se institucionet dhe qytetarët e republikës së Kosovës janë thellësisht të përkushtuar për një të ardhme më të mirë për të gjithë, pa marrë parasysh përkatësinë etnike e fetare.