Zëvendëskryeministri Hajredin Kuçi në takim ekspertët e Komisionit Evropian, shprehu gatishmërinë dhe vullnetin e Qeverisë së Republikës së Kosovës për të plotësuar të gjitha kriteret e kërkuara me qëllim të nënshkrimit të marrëveshjes tregtare me Bashkimin Evropian. ..


Ndërkaq, ekspertët e Komisionit Evropian duke çmuar lart punën dhe qasjen e Qeverisë së Kosovës diskutuan detajet konkrete të kësaj marrëveshje, duke përmendur kështu nevojën e krijimit dhe reformimit të një sistemi funksional tregtar e cila do të krijonte besimin se Kosova është e gatshme jo vetëm të negociojë dhe nënshkruaj këtë marrëveshje por edhe të jetë zbatuese e saj.

Në kuadër të kësaj marrëveshje janë diskutuar çështje konkrete në fushën e doganave, rregullat e konkurrencës, të cilat ndikojnë në krijimin e një ambienti të përshtatshëm për investime, mbrojtjen e të drejtave të autorit, reformimin e prokurimit publik, zgjidhjen e kontesteve ndërinstitucionale, eliminimin e barrierave tarifore dhe shumë çështje të tjera që hyjnë në fushën e tregtisë.

Zëvendëskryeministri Kuçi, Ministri për Tregti dhe Industri, Lutfi Zharku dhe Ministri i Ekonomisë dhe Financave, Ahmet Shala treguan vështirësit që Kosova ka në pjesëmarrjen dhe eksportimin e mallrave që garanton marrëveshja CEFTA dhe kërkuan nga të pranishmit që të bëjnë presion të vazhdueshëm në Beogradin zyrtar për të hapur dyert e bashkëpunimit ekonomik.

Ekspertët e Komisionit Evropian po qëndrojnë për një vizitë tre ditore në Kosovës, me qëllim të analizimit të gjendjes në lidhje me plotësimin e kritereve të kërkuara për nënshkrimin e marrëveshjes tregtare në mes të Republikës së Kosovës dhe Unionit Evropian.