Gjakovë, 10 korrik- Një person është vrarë dhe dy të tjerë janë plagosur me armë zjarri në fshatin Babaj të Bokës, tetët kilometra larg Gjakovës. Kjo vrasje ka tronditur gjithë banorët e kësaj ane.
Ngjarja ka ndodhur rreth orës 7.30 minuta, të shtunën në mëngjes. Aktin e vrasjes dhe plagosjes së këtyre personave e ka konfirmuar edhe zyrtari për Informim i Drejtorisë së
Policisë Rajonale në Pejë Xhevat Ibra. Mirëpo ai nuk ka dhënë hollësi për ngjarjen e kobshme. Ndërkohë në Spitalin Rajonal “Isa Grezda”, në Gjakovë, kanë thënë se rreth orës 8 e 30 minuta në emergjencë janë pranuar dy të plagosur. Sipas mjekëve kujdestarë i plagosuri Ismet Hajdari është i qëlluar në kokë me armë zjarri dhe është në gjendje të
rëndë shendetësore, prandaj është përcjellë menjëherë në QKU, në Prishtinë, ndërsa i
plagosuari tjetër, Luan Syl Bajrami me plagë në kraharor është duke u kuruar në Spitalin e Gjakovës.
Njoftohet se policia ka rrethuar vendin e ngjarjes, ndërkohë po bëhen hetime. Hetuesit në vendin e ngjarës kanë gjetur një pistoletë afër trupit të viktimës. Ndërkohë, trupi i të
vrarit është dërguar në Morgun e Prishtinës për obduksion dhe ekzaminim.
Banorët e fshatit Babaj Bokës pohojnë se fillimisht me armë zjarri është qëlluar në kokë Ismet Hajdari, rreth moshës 40 vjeç, pastaj i biri i tij, Qendrim Ismet Hajdari, rreth 20 vjeç, student i vitit të parë në Fakultetin Juridik në Prishtinë. Gjithnjë sipas deklaratave të banorëve të fshatit, autori i vrasjes është banor i fshatit Babaj Bokës (L (S) B), rreth 30 vjeç, i cili po kurohet në Spitalin Rajonal të Gjakovës nën mbikëqyrjen e policisë. Sipas të dhënave të para shkak i kësaj ngjarje të kobshme ka qenë mosmarrëveshja për rendin e ujitjes së tokës.
Fshati i Babaj Bokës ka një bilancë të kobshëm vrasjesh, që kanë ndodhur pas çlirimit të Kosovës dhe me largimin e forcave serbe, me saktë pas përfundimit të luftës së fundit në Kosovë. Në këtë fshat deri më tashti kanë ndodhur pesë vrasje.