Femrat e apasionuara pas partnerëve më të rinj në moshë duhet të bëjnë kujdes, sepse kjo mund t’u kushtojë shtrenjtë. Sipas një studimi gjerman, bashkëshorti ose i fejuari, 7 apo më shumë vjet më i ri, rrit me 20 për qind mundësinë e vdekjes së parakohshme tek femrat.

Sipas studiuesve, idealja për femrat është të martohen me një mashkull që ka moshën e tyre.
“Sa më e madhe të jetë diferenca e moshës tek çifti, aq më e madhe është mundësia e një vdekjeje më të hershme për femrën”, shprehet Sven Drefahl nga “Max Planck Institute for Demographic Research” në Rostock.
Sipas studimit, në rastin e dytë, jeta bëhet më stresuese dhe më pak e lumtur. Në këtë përfundim është dalë pasi janë marrë në analizë të dhënat relative të dy milionë çifteve në Danimarkë.
Modën e lidhjeve me meshkuj më të rinj e ka nisur aktorja Demi Moore, e ndjekur nga Madonna, por edhe Amanda Lear, Nina Moriq e Dita Von Teese.
Studimi thekson gjithashtu se për meshkujt më të rinj në moshë funksionon e kundërta, pra ata kanë mundësi të jetojnë më gjatë.