Festim Arifi i njohur me emrin artistik “Lyrical Son” konsiderohet si një nga rep-këngëtarët më të mirë në tregun kosovar.
Pothuajse në secilën këngë që merr pjesë ai, kënga shndërrohet në hit.
Edhe këtë sezon, Lyrical Son e shohim mjaftë aktiv në këngë dhe bashkëpunime me këngëtarë të tjerë. Këngës së tij “Tabularasa” e cila është shfaqur gjatë programeve të Vitit të Ri, ai muaj më parë ia ka realizuar videoklipin dhe tashmë kënga është në krye të top listave kosovare. Kjo këngë sipas disa gazetarëve në Gjermani është lëshuar edhe në klubet gjermane.
“Kam dëgjuar se kjo këngë lëshohet nga klubet gjermane. Më ka treguar edhe një gazetare shqiptare që jeton në Gjermani dhe për këtë ndihem shumë i lumtur sepse po vlerësohet puna ime edhe në tregun e huaj”, shprehet modest Festimi duke thënë se kjo këngë nuk është hera e parë që këngët shqipe dëgjohen nëpër klubet muzikore të huaja.
“Kemi shumë këngë të cilat janë dëgjuar nëpër klube të huaja, kemi pas rastin e këngës “Albanien” pastaj bashkëpunimi me “Dj. Blond” dhe shumë këngë të tjera”, thotë Festimi.
Por, nuk është vetëm kjo këngë e cila është ndër këngët me të dëgjuara në Kosovë, një këngë tjetër mjaftë e pëlqyer është edhe bashkëpunimi me “MC Kresha” ft “Noga”.
“‘Mc Kresha’ është një rep këngëtar i shkëlqyer dhe unë e përgëzoj për këngët e tij që i ka publikuar gjatë kësaj sezone, ndërsa duhet ta përmendi edhe Agonin “Noga” që është vetëm 15 vjeçar, por ka talent i jashtëzakonshëm”, pohon reperi i njohur kosovar.
Censurohet kënga “Shihemi” në bashkëpunim me “New porn”
Një bashkëpunim tjetër i Festimit është me grupin “New porn” në këngën që sa po është dal në treg me titull “Shihemi”.
Mirëpo për shkak të disa sekuencave në videoklipin i cili është xhiruar nga produksioni “Entermedia”, kjo këngë është censuruar nga televizionet tona, veçanërisht ato kombëtare.
“Nuk e di pse e kanë censuruar. Nuk ka ndonjë sekuencë ku me e ditë se sa të ekzagjeruar për ta ndaluar. Ne shohim çdo ditë duke u transmetuar këngë dhe videoklipe me skena nga më të ndryshmet dhe nuk u ndalohet emetimi.
Unë kam qenë vetëm mysafir në këtë këngë dhe me vjen keq prej grupit “New porn” se kënga është shumë e mirë dhe gjynah mos me u transmetuar”, thotë ai duke shtuar se do të këtë edhe shumë këngë dhe bashkëpunime të tjera gjatë ditëve të ardhshme, ku një nga ta do të jetë edhe me rep këngëtarin nga Shqipëria “Big Basta”.
“Unë jam reper universal. Me askënd nuk kam inate, jam anëtar i produksionit “Gramafon Entertaitment”, por gjithashtu bëj bashkëpunime me të gjithë kolegët e tjerë”.
Për “Lyrical Son” muzika është më shumë se profesion dhe hobi. “Muzikën e kam në gjak, ajo me rrjedh nëpër vena.
Është më shumë se profesion dhe se gjithçka tjetër”, thotë Festim Arifi duke premtuar se shumë shpejt do të sjell para publikut edhe albumin më të ri të tij.