Kryeministri Hashim Thaçi vlerësoi sot se opinioni i GJND-së është fitore historike për Kosovën dhe popullin e saj. Këto komente ai i bëri para deputetëve të Kuvendit të Republikës së Kosovës, duke shtuar se “tani është hapur perspektiva e plotë euroatlantike për Kosovën”.

Opinioni i GJND-së ka vulosur pavarësinë e Kosovës dhe ka respektuar vullnetin e qytetarëve të Kosovës tha kryeministrin Hashim Thaçi, në adresimin e tij para deputetëve të Kuvendit të Kosovës, në fillim të seancës së sotme plenare. Ai përsëritë se ky opinion është fitore historike për shtetin dhe popullin e Kosovës por edhe rajonit dhe nuk është kundër askujt.

“Shteti i Kosovës sot është shteti më i legjitimuar në drejtësinë ndërkombëtare, në historinë e re të krijimit të shteteve në botë. Ky mendim ka legjitimuar çdo përpjekje, angazhim politik e ushtarak, sakrificë individuale dhe kolektive të qytetarëve tanë gjatë shekujve, për liri e pavarësi”

Kryeministri përsëriti se pavarësisë së mbikëqyrur të Kosovës i ka ardhur fundi. ”Opinioni i GJND-së tani ka hapur perspektivën e qartë euroatlantike të shteti të Kosovës”, tha kryeministri Thaçi.

“Po hyjmë në kapitullin e integrimit në NATO, BE dhe me autoritetin tonë sovran kushtetues dhe ligjor. Në të njëjtën kohë, edhe një herë në emër të Qeverisë së Kosovës, pasi që opinioni i Gjykatës i ka dhënë përgjigje më të mirë, më të drejtë gjithë botës, edhe atyre vendeve që ende janë në proces të vendimmarrjes për njohje, ftoj që ta përshpejtojnë këtë vendim dhe ta njohin shtetin e suksesshëm të Kosovës”.

Kryeministri Thaçi foli edhe për mbështetjen e fuqishme që ka marrë nga Shtet e Bashkuara të Amerikës për shtetin e Kosovës. Ai tha tani do të punohet edhe më shumë edhe sa i takon zhvillimit të brendshëm të Kosovës, në rrafshin e zhvillimit ekonomik dhe ngritjen e mirëqenies sociale të qytetarëve si dhe luftës kundër dukurive negative.

Ndryshe kryeministri Thaçi, në mënyrë indirekte dha përgjigje edhe në kërkesën e djeshme të AAK-së, që veriu i Kosovës të shpallet zonë e interesit nacional. “Për ne interes nacional është gjithë territori i Kosovës dhe afirmimi i të drejtave të të gjitha komuniteteve”.

Thaçi tha se do të ketë angazhim për shtet demokratik, funksional e shumetnik ku çdo qytetarë pa dallim do të ndihet krenar.