Komandanti i KFOR-it, gjeneral major, Erhard Buhler, ka ripërsëritur se veriu vazhdon të jetë sfidë sa i përket sigurisë, ndërsa incidentet që kanë ndodhur javëve dhe muajve të fundit i ka quajtur të patolerueshme.

Ai këto komente i bëri të martën në Mitrovicë, gjatë takimit me nënkryetarin e komunës, Riza Haziri, me ç’rast ka shprehur përkushtimin e tij për rritjen e angazhimit sa i përket përmirësimit të situatës së sigurisë në veri.

Buhler ka theksuar se ditëve të fundit janë rritur masat e sigurisë dhe numri i patrullimeve në veri, në mënyrë që të ndikohet pozitivisht në gjendjen e përgjithshme.

“Masat e sigurisë janë rritur në bashkëpunim me Policinë e Kosovës dhe EULEX-in”, ka thënë ai.

Në anën tjetër, nënkryetari Haziri, ka thënë se problemet kryesore në Mitrovicë janë rrjedhojë e mungesës së sundimit të ligjit.

“Në veri veprojnë struktura kriminale, ndërsa qytetarët shqiptarë nuk mund të lëvizin lirshëm, nuk kanë qasje në pronat e tyre dhe kjo shkakton problem”, ka thënë ai.

Haziri potencoi se si pasojë e këtyre rrethanave në jug ka shumë familje të zhvendosura nga veriu që kanë probleme me strehim dhe çështje sociale.

“Ka ende familje që jetojnë nëpër strehimore kolektive, ndërsa banesat apo shtëpitë që i kanë në veri nuk mund t’i shfrytëzojnë. Kjo sigurisht se sjell probleme për të gjithë ne”, ka thënë Haziri.

Ai ka përshëndetur rritjen e masave të sigurisë nga autoritet përgjegjëse, ndërsa ka kërkuar që të gjithë te jenë të përkushtuar për veriun, meqë gjendja është e brishtë dhe se incidentet e shpeshta bëjnë që tensionet të jenë të vazhdueshme. /A. Damati/