Ushtruesi i detyrës së presidentit të Kosovës, Jakup Krasniqi, ka thënë se krahas synimit të Kosovës për anëtarësim në strukturat e BE-së, përafrimi dhe anëtarësimi në NATO mbetet synim tjetër madhor i vendit.

Ai këto komente i bëri të enjten gjatë një takimi me komandantin e Forcës së Sigurisë të Kosovës, gjenerallejtënant Sylejman Selimi, të cilin e falënderoi për punën e mirë që ka bërë ai dhe FSK-ja për plotësimin e standardeve të kërkuara në procesin e ngritjes dhe të zhvillimit të kësaj force.

Ndërkaq, gjenerallejtënant Sylejman Selimi, ka njoftuar u.d. të presidentit Jakup Krasniqi për proceset nëpër të cilat po kalon Forca e Sigurisë së Kosovës, e në veçanti për procesin e trajnimeve të cilat janë duke u zhvilluar në bashkëpunim me vendet anëtare të NATO-s.

Ai ka thënë se synohet që 2012 të jetë vit i përmbushjeve të të gjitha objektivave profesionale që ka FSK-ja.

Ndryshe, në takim është biseduar edhe për infrastrukturën ligjore që ka të bëjë me FSK-në.