Tiranë, 26 tetor - Transparency International Albania ka bërë sot publik një perceptim global mbi korrupsionin, bazuar në sondazhet e 6 kompanive botërore. Sipas këtij publikimi Shqipëria është ngjitur me 8 vende në renditje, krahasuar me vitin 2009, ku pozicionohej në vendin e 95-të.

“Korrupsioni është më i lartë në ato vende ku qeveriset pa transparencë”,- deklaroi Endri Shabani, përfaqësues i TIA-s. Sipas publikimit më të fundit nga Transparence International Albania, Shqipëria shënon një rritje prej 3.3.

Shqipëria renditet e 87-ta në botë dhe e 6-ta në Ballkan, duke lënë mbrapa vetëm Bosnje-Hercegovinën dhe Kosovën. Përgjithësisht “vërehet një rritje në pozicionimin e vendeve të Ballkanit Perëndimor”, - theksohet në publikim. Për sa i përket perceptimit global, Kosova perceptohet “si vend i korruptuar”,- sqaron Shabani.

Sipas “Guardian” të Londrës, Kosova ndodhet në vendin e 114-të për nivelin e korrupsionit. Ajo është në grup me Beninin, Bolivinë, Gabonin, Indonezinë dhe Ishujt Solomon. Që të gjitha kanë të njëjtin koeficient – 2.8. Për Kosovën nuk ka pasur matje të nivelit të korrupsionit gjatë viteve 2008 e 2009.
Serbia ndodhet në vendin e 83-të, Maqedonia 63-të, Mali i Zi në vendin e 71-të dhe Bosnja në vendin e 91-të.
E fundit për nga niveli i korrupsionit, sipas Transparency International, ndodhet Somalia – e 178-ta, dhe pak më mirë janë Burma (Myanmari), Afganistani, Iraku, Uzbekistani dhe të tjera.