Prishtinë, 5 nëntor - Komisioni Qendror i Zgjedhjeve i Republikës së Kosovës është duke bërë përgatitje intensive për organizimin e zgjedhjeve për Kuvendin e Kosovës, që do të mbahen më 12 dhjetor 2010. Përmes një komunikate për media, KQZ njofton se në mbështetje të ligjit, në Planin Operacional për Zgjedhjet, sot, prej datës 5 nëntor deri më 26 nëntor, fillon periudha e regjistrimit/aplikimit në kuadër të Operacionit të votimit përmes postës. Të interesuarit, qytetarët e Republikës së Kosovës, të cilët ndodhen jashtë vendit, mund të aplikojnë për t’u regjistruar dhe për të votuar me postë, njofton KQZ-ja.

Komisioni Qendror i Zgjedhjeve, njofton se aplikacionin për votim përmes postës, të interesuarit mund ta marrin nga burimet e mëposhtme: Web faqja e KQZ: www.kqz-ks.org; Linja ndihmëse e programit për të votuar nga jashtë Kosova është: +381 (038) 38 552 452; +381 (038) 38 552 453, pastaj: ambasadat e Republikës së Kosovës ( për adresat e tyre, ju lutem kliko këtu) duke e marrë formularin personalisht në një nga pikat e shpërndarjes jashtë Kosovës, për të shikuar listën e qendrave shpërndarëse dhe adresat e tyre, ju lutem klikoni këtu.

Për të plotësuar kushtet që të votoni nga jashtë Kosovës ju duhet që: Të keni moshën 18 vjeçare në ditën e votimit, më 12 dhjetorë 2010; të jeni të regjistruar në Regjistrin civil të Kosovës/UNMIK-ut dhe të posedoni dokumentin e identifikimit (DI) të Kosovës, ose të UNMIK-ut, apo vërtetimin që dëshmon se jeni person legjitim për t’u regjistruar në Regjistrin civil të Kosovës. Nëse ju posedoni dokument të identifikimit të Kosovës ose të UNMIK-ut me afat të skaduar, ju lutemi që së bashku me këtë, dërgojeni edhe një kopje të një dokumenti valid të identifikimit të shtetit ku jetoni. Aplikacionet për votim përmes postës duhet të pranohen apo arrijnë në KQZ para datës 16 nëntor 2010, thuhet në komunikatë.