Prishtinë, 10 dhjetor – Është rritur gatishmëria e serbëve për të marrë pjesë në zgjedhjet e 12 dhjetorit, ka thënë Seska Stonajloviq, nga Komiteti i Helsinkit për të Drejtat e Njeriut në Beograd.
Gjatë konferencës së tretë lidhur me pjesëmarrjen e serbëve në zgjedhjet e jashtëzakonshme të 12 dhjetorit, të mbajtur të enjten, në Qendrën Mediale në Çagllavicë, pos që është bërë apel për pjesëmarrje të serbëve, është vlerësuar që njëkohësisht në krahasim me zgjedhjet e kaluara është rritur gatishmëria për pjesëmarrje.
Seska Stonajloviq, nga Komiteti i Helsinkit për të Drejtat e Njeriut, që kishte ardhur në vend të Sonja Biserkos, për të cilën është thënë se i ishte dashur të udhëtonte urgjentisht për në Sarajevë, ka vlerësuar se rrethanat e reja kanë ndikuar që të krijohet një qasje tjetër e serbëve.
“Kanë ndodhur disa çështje të mëdha, të cilat në një formë apo tjetër kanë ndryshuar gjërat”, ka thënë Stonajloviq.
“Çështja e parë është Mendimi i Gjykatës Ndërkombëtare të Drejtësisë, pastaj Rezoluta të cilën Serbia së bashku me Unionin Evropian e ka dorëzuar në Organizatën e Kombeve të Bashkuara dhe natyrisht edhe paralajmërimi i dialogut Prishtinë-Beograd dhe në kontekst të këtyre rrethanave të reja është me rendësi që serbët të veprojnë si subjekte autonome politike”, ka shtuar më tutje ajo.
Sipas saj, me pjesëmarrjen në zgjedhjet parlamentare serbët po vazhdojnë të konstituohen si subjekte relevante politike dhe aktorë të rëndësishëm për qëndrueshmërinë e tyre në Kosovë.
“Serbët po janë gjithnjë e më shumë të vetëdijshëm se Beogradi në mënyrë ekonomike po fundoset. Kjo, sepse kriza ekonomike ka lënë pasoja të mëdha dhe ka ndikuar që të kuptohet se fondet me të cilat Beogradi i ka mbajtur iluzionet e serbëve, nuk do të zgjasin përgjithmonë”, ka thënë përfaqësuesja nga Komiteti i Helsinkit.
Stonajloviq, duke folur për përkrahjen që u është dhënë projekteve të serbëve në Kosovë, ka përmendur edhe vizitën që i është bërë Graçanicës nga sekretarja amerikane e Shtetit, Hillari Clinton.
Ndërsa Miljenko Dereta, drejtor i Iniciativave Qytetare në Beograd, ka treguar se nga vizitat që u ka bërë serbëve që jetojnë në Kosovë, ka parë një inkurajim dhe është befasuar pozitivisht nga gatishmëria e tyre për pjesëmarrje në zgjedhje.
Përderisa ka përmendur se serbët kanë filluar ta kuptojnë realitetin e ri në Kosovë, Dereta e ka parë me sy pozitiv edhe qëndrimin e Beogradit.
“Ne e kritikojmë qeverinë tonë në përgjithësi, por në këtë moment duket që ka gjetur formulimin duke qenë mjaft e hapur, në mënyrë që askush të mos ndihet i kërcënuar nëse vendos të marrë pjesë në këto zgjedhje dhe ky është një realitet i ri”, ka thënë Dereta.
Ai gjithashtu ka thënë se serbët duhet të tregojnë që nuk janë të kthyer me fytyrë nga Beogradi e me shpinë nga Prishtina, por t’u kthehet shpina Beogradit, kurse fytyra Prishtinës.
Kurse Dushan Bogdanoviq, nga fondi “Biljana Kovačević Vučo”, ka thënë se ka presione nga Beogradi, por presionet vijnë edhe nga serbët e veriut.
“Beogradi ende nuk është në situatë të tejkalojë këtë shkallë, e cila nuk është edhe aq e lartë dhe të ndërpresë që ta çojë veten në këmbë, kur janë në interes bashkëqytetarët e tyre, të cilët nuk jetojnë në kufi të Serbisë”, ka thënë ai.

Drejtori i Iniciativave Qytetare në Beograd, Miljenko Dereta, ka dënuar vrasjen e Shefko Sallkoviqit dhe plagosjen e Edin Islamoviqit, në veri të Kosovës.
Ai ka vlerësuar se ka ende persona që nuk janë pajtuar me realitetin në Kosovë, ndërsa nuk janë të gatshëm që t’i humbin pozitat e tyre.
“Mendoj se ata që e kanë linjën e fuqishme në veri, nuk do të dorëzohen lehtë dhe do t’i ndryshojnë qëndrimet e tyre lehtë”, ka thënë Dereta.