Zyrtarët kosovarë që kanë rënë ndesh me ligjin mund të ndihen “komodë” të paktën deri në fillim të muajit shkurt, kur edhe pritet të përfundojë procesi zgjedhor dhe konstituimi i institucioneve të reja.
Këtë “komoditet” ua kanë krijuar përfaqësuesit e EULEX-it, të cilët para fillimit të fushatës zgjedhore e kanë “fjalën” se deri në konstituimin e institucioneve të reja, nuk do të veprojnë me arrestime dhe aktakuza.
Po ashtu kësaj heshtjeje të EULEX-it i kanë ndihmuar edhe festat e fundvitit, shkruan Zëri. Kjo për faktin se shumë nga zyrtarët e këtij misioni kanë shkuar në vendlindjet e tyre, prandaj sipas burimeve ndërkombëtare, ky përgjysmim i stafit, në një mënyrë a tjetër ka ndikuar në “mosefikasitetin e këtij misioni”.
Megjithëse, nuk është parë ndonjë arrestim apo ngritje akuze në javët dhe muajt e fundit për ndonjë zyrtarë të Kosovës, zyrtarë të EULEX-it thonë se janë duke e vazhduar punën normalisht.
“Absolutisht nuk ka pasur dhe nuk ka asnjë marrëveshje në mes të EULEX-it dhe institucioneve të Kosovës për t’i pauzuar aktivitetet gjyqësore për shkak të zgjedhjeve. Ne vazhdojmë të punojmë me Policinë e Kosovës, me Doganën e Kosovës dhe me institucionet gjyqësore në Kosovë ashtu si edhe më parë”, ka sqaruar zëdhënësi i EULEX-it, Blerim Krasniqi.
“Është e vërtetë se ka një vakuum të vogël në nivel politik, pas shpërndarjes së Kuvendit dhe dorëheqjes së Qeverisë, sidoqoftë puna në sferën e sundimit të ligjit është duke vazhduar”, ka thënë më tej Krasniqi.
Sido që jetë, ai ka thënë se gjykimet janë duke u kryer, vendimet janë duke u shqiptuar dhe aktakuzat janë duke u ngritur.
