Prishtinë - Boksieri i peshës së rëndë Luan Krasniqi ka vendosur ta ndihmojë Përfaqësuesen e Kosovës në boks me pajisje të nevojshme për punë dhe gara, e që sipas drejtuesve të saj deri tash i kanë munguar.
Në një konferencë për media të martën në Prishtinë, drejtuesit e Përfaqësueses dhe të Federatës janë shprehur mirënjohës për ndihmën që kanë marrë.
"Tash e tutje na mbetet vetëm të punojmë, pasi unë isha ai që tërë kohën jam ankuar për mungesë të pajisjeve", ka thënë përzgjedhësi Mehmet Haxhani, për të shkuar edhe më larg: "Jam i bindur se pas kësaj do t'ia kthejmë boksit namin e dikurshëm".
Në pakon e Krasniqit janë përfshirë të gjitha pajisjet për punë me boksierë dhe gara, si fanella, dorëza, kapela, mbrojtëse të dhëmbëve e  pajisje të tjera.
Zyrtarët e FBOXK-së kanë falënderuar Krasniqin për ndihmën dhe për lobimin që sipas tyre po bën për pranimin e FBOXK-së në organizatat ndërkombëtare të këtij sporti.
"Ndihmë jashtëzakonisht e madhe për ne. Duam t'ia arsyetojmë me rezultate të mira, pasi dëshira e Luanit është që Kosova të ketë boksierë sa më të mirë", ka thënë sekretari i FBOXK-së, Mehmet Bogujevci.
Krasniqi ka shtuar se ky është vetëm fillimi. Ai ka premtuar edhe "pako" të tjera për boksin kosovar.
"Këto pajisje që i kam sjell për Përfaqësuesen e Kosovës besoj se do të gjejnë vendin e vet dhe do të sjellin suksese në të ardhmen", tha Krasniqi. "Ky është vetëm fillimi i ndihmës për boks, shumë shpejt priten edhe të tjerat. Boksi ka reputacion të hatashëm dhe besoj se këtë edhe do ta dëshmojë".
Krasniqi ka folur edhe për njohuritë që ka për boksin e Kosovës, kurse për lobimin që po bën ka preferuar të flasë më gjerësisht kur të pranohet FBOXK-ja.