Stine lidhet me kengetaren kosovare
“Dashuria fillon”, është një klip që jo rastësisht është titulluar kështu nga Ernest Duka, i njohur me emrin Stine. Klipi i sapoblikuar është një bashkëpunim me këngëtaren 19 vjeçare nga Kosova, Adelina Berisha me të cilën, këngëtari ka nisur një lidhje dashurie. Adelina është parë në klipin e saj “Merre këtë shpirt”, për realizimin e së cilës ajo kishte bashkëpunuar me tekstshkruesin Avni Qahili dhe kompozitorin Virusi. Ndërsa kësaj here bashkëpunëtori i saj jeton në Tiranë. Një takim i rastësishëm gati një vit më parë ka vlejtur për më shumë se kaq. Adelina dhe Stine kanë realizuar këto ditë këngën “Dashuria fillon”, një krijim që përjetëson fillimin e një historie dashurie. Kjo është e dashura aktuale e Stines, dhe bashkë ndihen mirë në krah të njëri-tjetrit. Ata janë njohur në Kosovë nëntorin e kaluar kur u ndodhën bashkë në xhirimet e klipit të përvitshëm për Vitin e Ri, ndërsa Stine këndonte “Vajzë ndaloje vrapin” me grupin “Skillz”. Që nga ai takim i rastësishëm, ata i ruajtën kontaktet fillimisht si shokë, ndërsa janë takuar më vonë gjatë udhëtimeve të tij në Prishtinë, ku ai udhëtonte shpesh për përgatitjen e albumit të ri. Po ashtu edhe këngëtarja ka udhëtuar shpesh drejt Tiranës, së bashku me nënën e saj, ku ka pasur dhe mundësi të njihet më shumë me Stinen. Edhe pse kishin një vit që ruain miqësinë si shokë, ata kanë hyrë në intimitet tani vonë, në mbyllje të fushatës zgjedhore në Kosovë. Nuk dihet se si do të shkojë më tej lidhja e tyre, por ndërkohë Stine është duke punuar për këngën më të re të Adelinës dhe ka menduar ta marrë në menaxhim si këngëtare. Duket si një lidhje që ka nisur bukur me udhëtime të ndryshme, kjo edhe për faktin që janë të dy në të njëjtin profesion dhe mbase kuptohen mirë si çift.
Por lidhja e re nuk e ka penguar Stinen, që të kthejë kokën pas dhe t’i dedikojë diçka speciale dashurisë së tij të vërtetë që ka provuar në jetën e tij. Stine është duke punuar intensivisht për ta përfunduar në kohë klipin e tij të radhës, që i kushtohet pikërisht asaj, të komentuar si lidhja më e gjatë e Stines, pasi zgjati plot tre vite. Është një klip, ku këngëtari i drejtohet asaj që e bëri të vuajë, por edhe që e bëri të prekë dashurinë e vërtetë. Këngëtari është në dilemë nëse mund ta titullojë “Urimi më i mirë” apo “Gëzuar Vitin e ri”. Dhe jo pa qëllim këta tituj, po për faktin se kantautori u njoh me Rozën natën e Vitit të Ri katër vite më parë dhe u nda një vit më parë. E tani që Roza nuk është më pjesë e jetës së tij, ka vendosur t’i bëjë këtë dhuratë publike, ku mund të gjejnë vetëm shumë të ndarë të tjerë. Ndërkohë që kanë nisur xhirimet e klipit Tiranë, kantautori ka preferuar t’i mbajë sekret vargjet deri në publikimin e këngës. Në klip luan një aktore, që do të simbolizojë ish të dashurën me tiparet e biondes, e ngjashme me Rozën, vajzën e Rita Latit. Klipi ëshë bazuar mbi një skenar të plotë, të ngjashëm me atë të një telenovele dashurie.
