Pas protestës së Lëvizjes “Vetëvendosje”në Prizren kundër vendimit të Gjykatës Kushtetuese për ndryshime në logon e Komunës së Prizrenit, policia ka arrestuar pesë aktivistë të kësaj lëvizjeje.
“Arrestimet e dhunshme ndodhën shumë pak minuta nga mbyllja e demonstratës paqësore që lëvizja organizoi me rastin e 132 vjetorit të Lidhjes Shqiptare të Prizrenit, për identitet e dinjitet kombëtar, në të cilën morën pjese mijëra shqiptarë nga të gjitha trevat shqiptare të cilët kundërshtojnë ndryshimin e stemës së komunës së Prizrenit”, thuhet në një njoftim të “Vetëvendosje”.

Emrat e të arrestuarve janë Durim Xhemajli, Durim Jasharaj, Arianit Sadiku, Muhabet Shemsiu dhe Hekuran Sejfullahu, ndërsa në njoftim thuhet se “aktivistet janë arrestuar pa asnjë arsye”.

Ndërkohë, Policia e Kosovës ka lëshuar një komunikatë ku thuhet se pjesëtarët e saj kanë bërë arrestimin e gjashtë personave, të cilët me një furgon kishin hequr flamuj të Kosovës dhe të shteteve mike, që ishin vendosur nëpër qytetin e Prizrenit për nder të 132-vjetorit të Lidhjes së Prizrenit. /Telegrafi/