Përveç angazhimeve të shumta në serialin “Spitaliks”, Ryva Kajtazi ka gjetur kohë që të realizojë edhe këngën ritmike “Hipnotizon”, të cilës ia ka bashkangjitur edhe video-klipin.

Ryva tha për Kosovapress se kënga ka dalë shumë e mirë, është shumë ritmike dhe e ka punuar Çeliqi në bashkëpunim me Bleron, i cili e ka bërë tekstin. Ndërsa, klipin e ka realizuar në Tiranë me Max-production dhe jashtëzakonisht është e kënaqur me punën e tyre.

“Besoj që ka dalë një këngë dhe klip i mirë për sezonin veror. Kam komente të mira për këngën dhe klipin, i cili nuk ka ndonjë ngjarje interesante, pasi nuk kam dashur të zhvilloj shumë, pasi që është një këngë ritmike verore dhe nuk donë ndonjë filozofi të madhe, por ka skena të bukura”, ka thënë Ryva.

Ndërsa, sa i përket fabulës së këngës, Ryva thotë se përshkruan disa emocione pozitive gjatë kontaktit të parë të një djaloshi me një femër, të cilës i pëlqen mënyra se si flet ai, mënyra se si e shikon dhe me një fjalë e “hipnotizon” një vajzë.