Prishtinë, 22 shtator - Drejtori ekzekutiv i Institutit për Studime të Avancuara (GAP), Shpend Ahmeti nuk do t’i bashkohet AAK-së të Ramush Haradinajt, por së shpejti do të formojë subjekt politik.

Aktivisti i njohur i shoqërisë civile, ekonomisti i njohur dhe kritikuesi i punës së qeverive, në një intervistë për televizionin Klan Kosova ka përgënjeshtruar afrimin e tij në AAK, por ka bërë të ditur se me njerëzit e GAP-it do të garojnë në zgjedhjet e ardhshme parlamentare, që do të mbahen në vjeshtën e vitit të ardhshëm.

Ahmeti kategorikisht ma mohuar të ketë vendosur t’i bashkohet partisë së ish-kryeministrit të Kosovës, Ramush Haradinaj, sic patën raportuar mediat.

“Jam duke punuar së bashku me një grup të rinjsh nga shoqëria civile në krijimin e një koncepti të ri politik, gjegjësisht të një alternative politike në Kosovë. Aty ka edhe biznesmenë të njohur, të zhgënjyer nga subjektet politike”, ka thënë Ahmeti.

Ai e ka pranuar se ka pasur kontakte me parti të caktuara politike, por nuk ka vendosur nëse do t’i bashkohet ndonjërës prej tyre.

Së fundit, emri i tij lakohej si ministër I Ekonomisë, në riformatimin e Qeverisë së Kosovës, që ndodhi në pranverë të këtij viti.

Edhe Lëvizja Vetëvendosje, nga ana tjetër, është duke u përgatitur për zgjedhjet e ardhshme parlamentare.