Një automjet privat “Passat”, me targa “KM”, pronë e një 35 vjeçari është djegur tërësisht të premten në orët e hershme të mëngjesit si rezultat i hedhjes së një përzierje molotovi.

Sipas ankuesit të këtij rasti, dëmet materiale arrijnë shumën rreth 9500 euro, ndërsa nuk ka të lënduar në njerëz dhe deri tani hetuesit policor besojnë se ky akt është i motivuar mbi baza kriminale.

Një akt i ngjashëm i motivuar mbi baza kriminale të shkaktimit të rrezikut të përgjithshëm, ka ndodhur vetëm 5 minuta më vonë në qendër të Zubin Potokut.

Një dyqan ushqimor dhe një barnatore, po ashtu pronë të një serbi 51 vjeçar, janë dëmtuar si rezultat i të shtënave me armë zjarri, nga persona ende të paidentifikuar.

Zëdhënësi i policisë për rajonin e Mitrovicës, toger Besim Hoti tha se në vendngjarje veç njësive policore të stacionit Zubin Potok, kanë dalë edhe njësitë rajonale të hetuesve policorë së bashku me teknikët e kriminalistikës, të cilët kanë bërë ekzaminimin e vendit të ngjarjes dhe inicimin e hetimeve të para të rastit.

“Së paku 30 gëzhoja të kalibrit 7.62 mm, janë gjetur dhe marrë si pjesë e provave materiale, të cilat besohet t’i përkasin armës automatike të përdorur në këtë akt kriminal”, ka thënë Hoti, duke shtuar se nuk ka pasur të lënduar në njerëz.