Ish-presidenti i Kosovës, Fatmir Sejdiu ka thënë se muaji mars i vitit të ardhshëm, mund të jetë koha më e mirë për mbajtjen e zgjedhjeve të parakohshme në Kosovë, të cilat janë bërë të pashmangshme pas dorëheqjes së tij nga posti i presidentit.

Në një intervistë për “Zërin e Amerikës”, Sejdiu ka thënë se për zgjedhjet e parakohshme nevojitet të bëhen përgatitje të mira, në mënyrë që të ketë një proces zgjedhor, i cili do të jepte shansin e barabartë për të gjithë njerëzit e Kosovës për të shprehur vullnetin e tyre.

“Për ne është me rëndësi që do të kemi pajtimin besoj, këtë e shoh edhe në gjithë spektrin politik të Kosovës që ato të jenë të parakohshme në kuptimin e mos shkuarjes në nëntorin e vitit 2011, por që të lëvizë më herët, që të jetë ta zëmë në pranverën e hershme. Unë them se marsi mund të jetë një muaj i përshtatshëm”, ka thënë Sejdiu.

Ndër të tjera, ish-presidenti Sejdiu e cilëson të panatyrshëm dhe të pa arsyeshëm vendimin e Gjykatës Kushtetuese që çoi në dorëheqjen e tij. Ai paralajmëroi vazhdimin e punës së tij në krye të Lidhjes Demokratike të Kosovës.

“Unë them se ka qenë një rrjedhë e panatyrshme dhe një vendim jo i arsyeshëm, i ngutshëm. E kam pranuar si të tillë, në kuptimin e ndjenjës sime për respekt ndaj institucioneve të vendit”, ka thënë Sejdiu.

Fatmir Sejdiu ka dhënë dorëheqje të hënën e kaluar, pas konstatimit të Gjykatës Kushtetuese për shkelje të Kushtetutës, duke mbajtur dy poste në të njëjtën kohë, atë të presidentit dhe kryetarit të LDK-së. Pas dorëheqjes së Sejdiut, postin e presidentit do ta ushtrojë kryetari i Kuvendit të Kosovës Jakup Krasniqi. Sipas Kushtetutës, ai këtë post mund ta ushtrojë për gjashtë muaj, ndërkohë që duhet zgjidhur presidenti i ri i vendit.

LDK ende nuk ka dalë me kandidatin për president të ri të vendit, i cili duhet të zgjidhet nga Kuvendi i Kosovës me dy të tretat e votave në dy raundet e para, ose me shumicën e thjeshtë prej 61 votave në raundin e tretë.

Ndryshe, zyrtarët e dy partive në koalicionin qeverisë PDK - LDK sot kanë mohuar të kenë arritur marrëveshjen rreth datës së mbajtjes së zgjedhjeve të parakohshme.