Qyteti i Prishtinës është zbukuruar gjithandej me flamuj shtetërorë të Kosovës dhe të Shteteve të Bashkuara të Amerikës - mesazhe këto mirëseardhjeje për Sekretaren amerikane të Shtetit, Hillary Clinton, e cila arrin sot për vizitë zyrtare në Kosovë.
Qytetarët e anketuar në Prishtinë thonë se janë të nderuar me vizitën e zonjës Clinton dhe bëjnë thirrje për një pritje madhështore në emër të saj. Sipas tyre, Shtetet e Bashkuara, në veçanti bashkëshorti i zonjën Clinton, ish-presidenti amerikan, Bill Clinton, kanë merita të veçanta për çlirimin e Kosovës dhe pavarësimin e saj.
Vizita e Sekretares amerikane të Shtetit vlerësohet edhe nga politikanët si vizitë e një rëndësie të veçantë, për shkak se bëhet në kohën kur Kosova po kalon në disa procese mjaft të rëndësishme.
Xhavit Haliti, anëtar i Kryesisë së Kuvendit të Kosovës nga PDK-ja, thotë se vizita e zonjës Clinton ka domethënie dhe rëndësi të madhe për të gjithë qytetarët e Kosovës dhe institucionet e vendit.
“Vizita e zonjës Clinton është e rëndësisë së madhe për Kosovën, por edhe për proceset nëpër të cilat po kalon rajoni. Është e rëndësishme veçanërisht për procesin në të cilin është Kosova, që duhet sa më shpejt t’i mbajë zgjedhjet dhe të fillojë dialogun (me Serbinë), i cili është i mbështetur edhe nga Bashkimi Evropian, edhe nga Shtetet e Bashkuara të Amerikës”, thotë Haliti.
Ai pret që vizita e Sekretares amerikane të Shtetit në Kosovë t’i inkurajojë institucionet kosovare për të filluar dialogun me Serbinë, si dhe të sigurojë mbështetjen amerikane gjatë këtij dialogu.
Ndërkaq, Ahmet Isufi, nga Aleanca për Ardhmërinë e Kosovës, ka thënë për RFE se vizita e zonjës Clinton ka domethënie për marrëdhëniet e mira në mes të Kosovës dhe Shteteve të Bashkuara.
“Shtetet e Bashkuara të Amerikës kanë ndihmuar shumë në pavarësimin e vendit dhe në politikën që kanë ndjekur qeveria amerikane dhe shteti amerikan. Prandaj, kjo vizitë është e mirëseardhur për qytetarët dhe institucionet e Kosovës... Po ashtu, jep një mesazh shumë të mirë se Shtetet e Bashkuara të Amerikës janë të interesuara edhe për Kosovën, por edhe për marrëdhëniet në rajon”.
Clinton tha të martën gjatë qëndrimit në Beograd se Serbia duhet t’i normalizojë raportet me Kosovën dhe se e ardhmja e të dyja vendeve është integrimi në strukturat euroatlantike. Ajo po ashtu tha se bazë e mirë për fillimin e bisedimeve në mes të Kosovës dhe Serbisë është rezoluta e miratuar së fundmi në Asamblenë e Përgjithshme të OKB-së. /Telegrafi/
_________________
