Athinë, 23 tetor - Një operacion i policisë greke mbrëmjen e së premtes u konkretizua me shkatërrimin e një organizate që tregtonte lëndë narkotike në kryeqytetin helen, Athinë, raporton Top Channel.
Sipas policisë së Athinës, në pranga ranë tre shtetas shqiptarë (23, 33, 35 vjeç) dhe një shtetase ruse 20 vjeçe. Operacioni u krye në lagjen Galaci, ku në një banesë të organizatës u gjetën 86 kilogramë kanabis, një peshore elektronike, ndërsa në një banesë tjetër të saj, u gjetën 15 kilogramë kanabis, 610 gramë kokainë dhe një sasi heroine.
Policia thotë se ka vënë në kërkim edhe tre anëtarë të tjerë të bandës edhe këta shqiptarë. Të arrestuarit u dërguan në Gjykatën e Athinës e cila vendosi t'i lë në burg deri në përfundimin e hetimeve.