Prishtinë, 23 tetor - Bujar Bukoshi dhe njerëzit e tij pritet t’i japin një goditje të fortë Fatmir Sejdiut. Ata, gjatë javës së ardhshme, do ta zyrtarizojnë “Koalicionin Rugova”, një fraksion ky brenda LDK-së, por që mund të shndërrohet në parti politike, raporton gazeta Express.
Ish-Ministri i Shëndetësisë i kërkon Fatmir Sejdiut ta braktisë postin e Kryetarit të LDK’së përpara se të jetë vonë
Udhëheqja e LDK-së pritet ta marrë një goditje të fortë javën e ardhshme, kur Bujar Bukoshi me njerëzit e tij të zyrtarizojnë “Koalicionin Rugova”, një fraksion ky brenda këtij subjekti, por që mund të shndërrohet në parti politike.
Burime të Express thonë se ideja për zyrtarizimin e këtij koalicioni ka nisur ditë më parë, derisa zyrtarizimi, sipas gjitha gjasave, do të bëhet të hënën, më 25 tetor.
Vetë ish-Ministri i Shëndetësisë nuk e ka mohuar një të tillë. “Po, së shpejti do të sqarohet kjo çështje. Kemi opsione të ndryshme...”, ka deklaruar Bujar Bukoshi, kur është pyetur nga Express për mundësinë e zyrtarizimit të “Koalicionit Rugova”.
“A di si është puna?”, ka pyetur Bukoshi. “Kur ky zotni (Fatmir Sejdiu) i mbyll rrugët, atëherë dalin zgjidhje të tjera”, ka shtuar ai.
Nisma e Bujar Bukoshit, i cili mbështetet nga djali i Presidentit Rugova, Uka, vjen pasi që njerëzit e Fatmir Sejdiut kanë paralajmëruar mundësinë e ndërprerjes së procesit elektoral brenda LDK-së, ose mbajtjen e një kongresi të shpejtë sa për të plotësuar kriterin ligjor për të marrë pjesë në zgjedhje.
Këto ide i ka dëgjuar edhe Bujar Bukoshi.
“Po, jemi në dijeni të mundësisë së ndërprerjes së procesit elektoral, por nuk janë informata të konfirmuara”, ka thënë ai.
Sipas tij, Fatmir Sejdiu po e shkatërron LDK-në dhe rrjedhimisht edhe procesin elektoral brenda kësaj partie.
“Ky njeri po e shkatërron LDK-në. Ky njeri duhet të japë dorëheqje prej LDK-së. Nëse ai nuk jep dorëheqje, atëherë të gjitha strukturat, gjithë njerëzit duhet të mblidhen dhe t’i thonë se - ti nuk je më Kryetar partie”, ka deklaruar Bukoshi, raporton Express.
