Prishtinë, 4 nëntor - Kryeministri në dorëheqje, Hashim Thaçi është takuar sot me përfaqësuesin civil ndërkombëtar në Kosovë, Pieter Feith. Në takim është diskutuar për zhvillimet aktuale politike në vend, posaçërisht për organizimin sa më të suksesshëm të zgjedhjeve të reja të 12 dhjetorit.
Thaçi ka shprehur përkushtimin e tij dhe të qeverisë për një proces zgjedhor të lirë, demokratik, transparent, të organizuar mirë, me pjesëmarrjen e monitoruesve ndërkombëtarë, ku qytetarët do të vendosin për zgjedhjen e institucioneve të ardhshme
të vendit.
Feith është shprehur me tone pozitive për përkushtimet e qeverisë në dorëheqje për ruajtjen e stabilitetit politik dhe institucional të Kosovës dhe po ashtu ka çmuar lart përkushtimin e Thaçit për zgjedhje të lira, demokratike, fer dhe transparente.
“Zgjedhjet e reja të 12 dhjetorit do të jenë edhe një test i ri për demokracinë në Kosovë. Besoj se gjithë klasa politike dhe institucionale do të dëshmojë pjekurinë e lartë shtetërore për të plotësuar me sukses edhe këtë standard të lartë demokratik, në rrugën e integrimit euro-atlantik të Kosovës”, ka thënë Feith.