Mitrovicë, 19 tetor - Dy raste të vënies së eksploziveve në antenat e operatorëve të telefonisë mobile të Kosovës kanë ndodhur në veri të vendit, por për fat të mirë nuk janë aktivizuar. Antenat e dy operatorëve kosovarë kësaj radhe kanë shpëtuar pa pasoja. Vënien e eksplozive në antenat e operatorëve ‘Vala’ dhe ‘IPKO’, në komunën e Leposaviqit, janë konfirmuar nga policia në Mitrovicës.
Dy raste të vendosjes së eksplozivit por të paaktivizuara janë regjistruar edhe gjatë mëngjesit të së martes në komunën e Lepsosaviqit, ka thënë zëdhënësi i policisë për rajonin e Mitrovicës, Besim Hoti. Sipas tij, rasti i parë është regjistruar rreth orës 6 e 40minuta, ndërsa një ankues i përkatësisë etnike serbe, banor i fshatit Tvrgjan, ka njoftuar për identifikimin e një mjeti të dyshuar eksplodues, të vendosur afër një antenë, transmetues të operatorit “Vala”, e cila gjendet në oborrin e shtëpisë së tij. Njësitë reaguese të policisë së Kosovës kanë bërë sigurimin e vendit të ngjarjes, ndërsa për arsye sigurie kanë evakuuar edhe anëtarët e shtëpisë, afër së cilës është identifikuar mjeti eksplodues, ka thënë Hoti. Sipas tij rasti tjetër, i ngjashëm, i raportuar të martën në mëngjes, është regjistruar në fshatin Jarinje, me ç’rast në transmetuesin e operatorit “IPKO” është vërejtur një mjet i dyshuar eksplodues. Njësitë përkatëse të ekspertëve të
KFOR-it janë ftuar në vend të ngjarjes për të proceduar me rastet e raportuara, ka thënë policia.
Një natë më parë po në Jarinje është hedhur në erë një antenë e operatorit ‘Vala’.
Burime te gazetës nga veriu i vendit njoftojnë se në luftën kundër antenave të telefonisë kosovare në veri të vendit janë aktivizuar grupe kriminale serbe të dirigjuara nga MPB e Serbisë dhe persona të identifikuar në pjesën veriore të Mitrovicës. Lidhur me këto informacion zëdhënësi i policisë për rajonin e Mitrovicës, Besim Hoti, ka theksuar se policia nuk ka informacione për këto, ndërsa që është duke i bërë hetimet rreth autorëve të mundshëm të vënies së eksploziveve.