Bruksel, 4 nëntor - Raporti i progresit i Bashkimit Evropian për Shqipërinë do të fokusohet tek situata konfliktuale politike në vend.

“Efikasiteti dhe stabiliteti i institucioneve demokratike nuk është në shkallën e duhur. Institucionet parlamentare dhe procedurat nuk funksionojnë si duhet”, thuhet në raport. Bazuar në këto vlerësime marrja e statusit të vendit kandidat për Shqipërinë do të shtyhet për një periudhë tjetër.

Raporti do të publikohet më 9 nëntor.

Sipas këtij raporti, Kroacia është në fazën finale të bisedimeve për anëtarësim në BE, por Turqia dhe vendet e tjera duhet të realizojnë më shumë reforma, të luftojnë krimin dhe të mbrojnë lirinë e mediave, thuhet në raportin vjetor të progresit. Mirëpo, as për Kroacinë KE-ja nuk ka dhënë ndonjë datë të saktë për përfundimin e bisedimeve për anëtarësimin e këtij vendi në BE.

I njëjti dokument vlerëson Serbinë për përpjekjet e fundit për të përmirësuar marrëdhëniet me Kosovën. Raporti kërkon nga qeveria serbe të përmirësojë bashkëpunimin tregtar me Kosovën dhe përsërit kërkesën ndaj Beogradit që të tregojë më shumë angazhim në kapjen e të akuzuarve për krime lufte.